近來經常都聽到揸車嘅朋友講，話而家抄牌抄得好勁，甚至部車會被拖走咗，搞到大家都唔敢隨便將架車停泊喺條街度。
其實大家有冇諗過，第日考到車牌，揸車出街時，部車應該擺喺邊度呢？到底點解隨便泊喺條街度會被抄牌，甚至被拖走？今日就同大家探討一下泊車先！
喺《道路使用者守則》裏面，分別係第92頁同埋第94頁，都有清晰地話畀我哋知，邊度唔畀泊車，同埋邊度可以泊車。將部車停喺以下地方，即屬違例，有機會收到俗稱 “牛肉乾” 嘅定額罰款通知書；嚴重者更會被拖走 ：
• 本身車輛會對其他道路使用者構成阻礙或危險的地方；
• 有街燈的道路 — 指設有街燈而之間相隔不超過200米的道路，但在劃定界線的泊車處除外；
• 本身車輛全部或部分在行人路、行人徑、道路中央分隔帶、路旁、路肩或安全島；
• 本身車輛會妨礙建築物或停車場的車輛通道 ；
• 本身車輛會妨礙由行車道通往消防龍頭的地方。
咁喺咩地方可以泊車呢？當然除咗停車場之外，就係俗稱 “錶位” 嘅泊車處喇！大家要留意，唔係所有泊車處都可以比私家車或者輕型貨車停泊，有啲只係可以停泊貨車或者巴士。
部車泊好喺 “錶位” 之後，就記得要按停泊時間 “入錶” 。而家開始愈來愈多新嘅 “咪錶” (即係路旁停車收費錶)，其中一個最犀利嘅功能，就係可以透過流動應用程式「入錶易」 喺現場或遙距 “入錶” ，真係好方便㗎！
其實大家只需要將部車泊喺合法嘅泊車處或者停車場，就唔使驚收到告票或者被拖走啦！
Please follow and like us:
